Owerri, Jihar Imo – Taron Kasa na Takwas na Dandalin Wakilan Kungiyar 'Yan Jarida ta Najeriya (NUJ), wanda aka gudanar a birnin Owerri, babban birnin Jihar Imo, ya mayar da hankali kan rawar da kafofin watsa labarai ke takawa wajen karfafa dimokuradiyya, tabbatar da gaskiya, da kuma sa shugabanni yin abin da ya dace. Wannan taro na wuni biyu wanda Kungiyar NUJ ta shirya a jihar Imo don gudanar da Babban zaben shugabancin kungiyar a matakin ƙasa, ya tattaro ‘yan jarida, masana kafofin watsa labarai, da masu ruwa da tsaki daga sassan kasar don tattaunawa kan taken taron, “Kafofin Watsa Labarai da Dimokuradiyya: Rawar ‘Yan Jarida Wajen Sa Shugabanni Yin Abin da Ya Dace.” 

A jawabinsa na bude taron, Gwamnan Jihar Imo, Hope Uzodimma, ya yaba wa ‘yan jarida bisa juriyarsu da jajircewarsu wajen gina kasa. Ya bayyana muhimmancin samun kafafen watsa labarai masu ‘yanci da ke taka muhimmiyar rawa wajen tabbatar da dorewar dimokuradiyya.  

“Kafofin watsa labarai masu ‘yanci su ne ginshikin dimokuradiyya kuma masu sanya ido kan yadda ake tafiyar da gwamnati,” in ji Uzodimma. Ya jaddada mahimmancin samun sahihan labarai, rahotanni marasa son rai, da kuma tabbatar da gaskiyar bayanai domin yakar labaran karya da kuma karfafa gwiwar jama’a.  

Haka nan, ya yaba wa jagorancin kungiyar NUJ bisa kokarin da take yi na inganta aikin jarida, tare da yin kira da a tabbatar da mika mulki cikin lumana yayin zabukan sabbin shugabanni.  

A nasa bangaren, Shugaban Kungiyar NUJ na Kasa, Comrade Chris Isiguzo, ya yi kira ga ‘yan jarida da su ci gaba da jajircewa, duk da kalubalen cin zarafi, matsalolin tattalin arziki, da kuma karancin ‘yancin aikin jarida da suke fuskanta. Ya bayyana cewa NUJ za ta ci gaba da ba da fifiko wajen tabbatar da gaskiya, hadin kai, da ingancin aikin jarida.  

"‘Yan jarida su dage su wuce barazanar da ake musu, su ci gaba da karantar da shugabanni kan wajibcinsu ga jama’a,” in ji Isiguzo. Ya kuma yi kira ga hadin kai tsakanin ‘yan jarida tare da yin aiki bisa ka’ida da gaskiya, maimakon neman daukaka ta hanyar yada labaran da ba a tabbatar da sahihancinsu ba.    

Shugaban Taro, Sanata Osita Ozunaso, OFR, ya jaddada bukatar ‘yan jarida su mallaki kafafensu na watsa labarai domin samun ‘yanci da dorewar aikin jarida.  

“‘Yan jarida ya kamata su fara tunanin mallakar jaridunsu domin tabbatar da dorewa da kuma ba da gudunmuwa mai karfi wajen gina kasa,” in ji Ozunaso. Ya kuma yi kira ga wakilai da su zabi shugabanni da za su ba da fifiko wajen kare hakkin mambobi da ci gaban aikin jarida.  

Ya kuma yaba wa jajircewar ‘yan jarida na Najeriya, yana mai cewa duk da kalubale, sun nuna kwarewa da kirkira a aikinsu.  

  

Taron ya kunshi tattaunawa mai zurfi kan rawar da kafofin watsa labarai ke takawa wajen bunkasa dimokuradiyya, inganta ci gaban karkara, da kuma magance matsalolin ka’idojin aikin jarida na zamani. Masana da wakilan taron sun jaddada bukatar hadin kai tsakanin ‘yan jarida, masu tsara doka, da kungiyoyin al’umma domin karfafa kafofin watsa labarai a matsayin wani bangare na tsarin dimokuradiyya.  

 Taron zai kare da zaben sabbin shugabannin NUJ, wanda zai zama wata babbar dama wajen tsara sabuwar alkibla ga kungiyar. Wakilai sun nuna kwarin gwiwa cewa sakamakon wannan taron zai taimaka wajen magance matsalolin da suka dade suna addabar masana’antar, tare da karfafa kirkire-kirkire da gaskiya.  

A yayin rufe taron, an cimma matsaya cewa aikin jarida a Najeriya ya zama dole ya yi gyara domin dacewa da bukatun al’umma mai saurin canzawa, tare da ci gaba da cika burin samar da sahihan labarai, ilmantarwa, da sanya shugabanni yin abin da ya dace.